Lah due ari ne Pak Udak merugu pek amben. Gara-gara nya mandik aek ujan sari mari e. Laen kerenyek e urang lah tua cemya. Ne kisah e....

Tapi dek usah dirikin, nama e ge Pak Udak. Ditegeh mandik, pacak-pacak nya meraning. Men lah nak ya, Udak kek mak e cuma ngeringeng merati pulah e.
Kena nuwa igek berujan ya lah, Pak Udak bekumbus kaen sarong. Dek pati renyek ngapalah. Keliat e, tengah penidir. Perang-perik asa badan e. Mon diitong-itong, kesian lah ningok badan lah tua cemya.
"Eeeehhh...ehhh.. Dingin ge asa badan ne..."
Pak Udak nerutop seurang-urang e lah sambil bepelok kek due tangen e.
Udeh ya, Pak Udak ngeriteng nak urang kerasok antu lelab. Ikak lah miker e, urang tua lah kek mati tapi agik renyek berujan. Dek matot.
"Ooo Daaak... Udaaaak....."
Pak Udak nyapai anek e nak buluh letop. "Kemana ge budak belis ya ok, asak urang tua nek perlu, dek suah keliat jungur e. Ne lah pa'al budak waktu kecit e ngidam kelatu. Lebih dari ikan belido."
                       ***

"Tulooong...tulooong..."
Dari dapuk umah, Mak Udak sabang sibuh lumpat kadep lamen gi mereh laki e. Piker e Pak Udak entah diganggu mese apa.
"Istipar Bak, istipar...nyebuut..."
"Nyebut, nyebut akek ki, imang e ki piker ko ne tengah ngapa nya?"
Mak Udak mereh nampek men, deket laki e. Tangen e nyuet kepala laki e. Kerasa anget. Gelugut imang lakiko ne, piker Mak Udak.
Barulah nya nek berangket, tangen Pak Udak lah migang e.
"Ki nek kemana Dik, ko tengah gelane cemne ki nek sekapot."
"Ukan cemya Bak...
"Lom abis aben laki madeh e, ki lah pacak nyela umongko pulik. Ki nek nyumpah ko ok...?"
"Sabar Bak, sabaarrr..."
Mak Udak neneng laki e.
"Denglah cak-cak sayeng kek ko ne. Keliat e ki ingen mon ko mati sari ne..."
"Muji Bak, istipar... Ko ne bini ki, pekak ngarep ki mati..."
Pening kepala Mak Udak miker perangai laki e. Tengah saket agik pacaklah ngeruce, apa agik mon lah sihat.
Dek lama udeh ya, Pak Udak lah nyuroh pulik. "Cube ki pereh Sakban, suroh Udak nugek e. Ko dek tahan agiklah, sapa tau ade mende alus pek badan ko ne Dik..."
Kena ngerasa kedingin, Pak Udak narik kaen saron e sampai kepala, nek ngumbus badan e. Nya dek tau aben kaen e lah terangket kates. Yang pek baweh dek pakai apalah. Apa tu, ngengelui keliat pekakas e nak terong keles terapet puntong pelawan. Maklomlah pekakas tua. Yang Mak Udak dek setingok aben kena sutek kek mijit kepala laki e.

            ***
"Baaak... Kami banyek dapet tepuyu sari ne..."
Dari adep lamen ade kedenger karoh Udak kek Amat Tepuyu. Nya urang due ya ngep-ngep nyabe e lumpat naek tingkap umah. Maksod e nek belagak kek bak e kena banyek dapet asel mancing. Ukan kek dialem, dektau e kek kena peraning.
"Daaaak..."
Pak Udak berangket dudok siah narik kaen sarong e tinggi-tinggi. Lah cemya, nambeh keliat pekakas e. Budak due ukan di ketakot kena keruce, tapi tekakak ningok mende pek baweh kaen sarong Pak Udak.
Mak Udak baru setingok kek bareng ya. Cepet-cepet nya ngerik.
"Baaaak...pekakas ki ngengelui ketingok kek kaben Udak."
Pas tesadar kek pengawi e cemya di, dek keruan tingkah Pak Udak nuron-naek kaen sarong e.
Mak Kulop takot laki e meraning, cepet-cepet madeh Udak kek Amat Tepuyu nyuroh nya urang due ya gi nugek Sakban. Panggan disuroh cemya, budak due ya begebeng nya lumpat. Ikan asel mancing agik ditinten pek tangen e dalem plastik asoy.

      ***

Nak uman diusek antu, Udak kek Amat Tepuyu gi kumah Mang Sakban. Tengah nyabe lepngul-lepngul, Udak ngucap salam pek tingkap umah Mang Sakban.
"Slamalaikooom.....
Lama muah Udak kek Amat Tepuyu nunggu, lom adelah saot dari dalem umah.
"Slamalaikoom...Mang Sakban....
"Dek meli, kami lah udeh maken sari ne...
Udak kek Amat beperati-perati setengah cigek. Panggen nak urang penyaket wel mu e muka budak due ya.
"Ki tadik ade nyebut apa sampai Mang Sakban nyaot mudel ya?"
Udak merati Amat. Yang diperati nginggel-nginggel kepala e. "Dek apalah Dak, kita kan cuma ngucap salam bai."
"Cube ki tugek agik Mat..."
Barulah Amat nek nyapai e, pek adep lawang umah lah keliat Mang Sakban. Urang tua ya dek bida sikit aben kek Pak Udak, sama-sama tukang mereteng.
"Sambelingkong, sambelingkong akek ki. Bilong ki kecurik ok. Lah ko padeh dek meli, agik maler sambelingkong-sambelingkong..."
Amat nyuwet kaki Udak. "Mang Sakban ne tuli urang e, panteslah nya dek nyambong."
Udak ngakak sekali terinteng kek umong Amat. "Matoootttt..."
Mang Sakban turon dari tanggek umah e, mereh budak due. Renyek nya nempap sungot Udak yang tengah ngakak ya. Cepet-cepet Udak berenti ngakak.
"Ikak ne dek mateh kek urang tua. Lah ko padeh ko dek renyek meli sambelingkong. Ngapa ge ikak dek nenger ne?"
Kena lah terinteng di, Udak merik reti pakai tangen kek Mang Sakban. "Kami ne ukang nyuwal sambelingkong Mang, tapi tadik e ngucap slamalaikom."
Mang Sakban merati tangen Udak ngangket kates. "Oooo, jadi ki nek belajar ngebang kek ko. Cemne Jang cara e."
Urang tua ya lah nurot ge ngangket tangen siah mucak kaen sarong. Sungot e lah siap nek ngebang.
"Allahu Akbar, Allaaaahu Akbaaaarrrr.....
Budak due ya temangal-mangal ningok pulah Mang Sakban. Apa tu, urang tua ya nambeh meraning. Tapi untong Udak cepet negeh e siah pakai base isarat.
"Mang kami minta maaf, Bak ko minta tolong. Nya tengah gelugut pek umah nu."