|
Lah due ari ne Bak Kulop merugu pek amben. Gara-gara nya mandik aek ujan sari mari e. Laen kerenyek e urang lah tua cemya.
Tapi
dek usah dirikin, nama e ge Bak Kulop. Ditegeh mandik, pacak-pacak nya meraning. Men lah nak ya, Kulop kek mak e cuma ngeringeng
merati pulah e.
Kena nuwa igek berujan ya lah, Bak Kulop bekumbus kaen sarong. Dek pati renyek ngapalah. Keliat e, tengah
penidir. Perang-perik asa badan e. Mon diitong-itong, kesian lah ningok badan lah tua cemya.
"Eeeehhh...ehhh.. Dingin ge
asa badan ne..."
Bak Kulop nerutop seurang-urang e lah sambil bepelok kek due tangen e.
Udeh ya, Bak Kulop ngeriteng
nak urang kerasok antu lelab. Ikak lah miker e, urang tua lah kek mati tapi agik renyek berujan. Dek matot.
"Ooo Loop...
Kuloooop....."
Bak Kulop nyapai anek e nak buluh letop. "Kemana ge budak belis ya ok, asak urang tua nek perlu, dek suah
keliat jungur e. Ne lah pa'al budak waktu kecit e ngidam kelatu. Lebih dari ikan belido."
***
"Tulooong...tulooong..."
Dari dapuk umah, Mak Kulop sabang sibuh lumpat kadep lamen gi mereh laki e. Piker e Bak Kulop
entah diganggu mese apa.
"Istipar Bak, istipar...nyebuut..."
"Nyebut, nyebut akek ki, imang e ki piker ko ne tengah
ngapa nya?"
Mak Kulop mereh nampek men, deket laki e. Tangen e nyuet kepala laki e. Kerasa anget. Gelugut imang lakiko
ne, piker Mak Kulop.
Barulah nya nek berangket, tangen Bak Kulop lah migang e.
"Ki nek kemana Dik, ko tengah gelane
cemne ki nek sekapot."
"Ukan cemya Bak...
"Lom abis aben laki madeh e, ki lah pacak nyela umongko pulik. Ki nek nyumpah
ko ok...?"
"Sabar Bak, sabaarrr..."
Mak Kulop neneng laki e.
"Denglah cak-cak sayeng kek ko ne. Keliat e ki ingen
mon ko mati sari ne..."
"Muji Bak, istipar... Ko ne bini ki, pekak ngarep ki mati..."
Pening kepala Mak Kulop miker
perangai laki e. Tengah saket agik pacaklah ngeruce, apa agik mon lah sihat.
Dek lama udeh ya, Bak Kulop lah nyuroh pulik.
"Cube ki pereh Sakban, suroh Kulop nugek e. Ko dek tahan agiklah, sapa tau ade mende alus pek badan ko ne Dik..."
Kena
ngerasa kedingin, Bak Kulop narik kaen saron e sampai kepala, nek ngumbus badan e. Nya dek tau aben kaen e lah terangket kates.
Yang pek baweh dek pakai apalah. Apa tu, ngengelui keliat pekakas e nak terong keles terapet puntong pelawan. Maklomlah pekakas
tua. Yang Mak Kulop dek setingok aben kena sutek kek mijit kepala laki e.
***
"Baaak... Kami banyek dapet tepuyu sari ne..."
Dari
adep lamen ade kedenger karoh Kulop kek Amat Tepuyu. Nya urang due ya ngep-ngep nyabe e lumpat naek tingkap umah. Maksod e
nek belagak kek bak e kena banyek dapet asel mancing. Ukan kek dialem, dektau e kek kena peraning.
"Looop..."
Bak Kulop
berangket dudok siah narik kaen sarong e tinggi-tinggi. Lah cemya, nambeh keliat pekakas e. Budak due ukan di ketakot kena
keruce, tapi tekakak ningok mende pek baweh kaen sarong Bak Kulop.
Mak Kulop baru setingok kek bareng ya. Cepet-cepet nya
ngerik.
"Baaaak...pekakas ki ngengelui ketingok kek kaben Kulop."
Pas tesadar kek pengawi e cemya di, dek keruan tingkah
Bak Kulop nuron-naek kaen sarong e.
Mak Kulop takot laki e meraning, cepet-cepet madeh Kulop kek Amat Tepuyu nyuroh nya
urang due ya gi nugek Sakban. Panggan disuroh cemya, budak due ya begebeng nya lumpat. Ikan asel mancing agik ditinten pek
tangen e dalem plastik asoy.
***
Nak uman diusek antu, Kulop kek Amat Tepuyu gi kumah Mang Sakban. Tengah nyabe lepngul-lepngul, Kulop ngucap salam pek
tingkap umah Mang Sakban.
"Slamalaikooom.....
Lama muah Kulop kek Amat Tepuyu nunggu, lom adelah saot dari dalem umah.
"Slamalaikoom...Mang
Sakban....
"Dek meli, kami lah udeh maken sari ne...
Kulop kek Amat beperati-perati setengah cigek. Panggen nak urang
penyaket wel mu e muka budak due ya.
"Ki tadik ade nyebut apa sampai Mang Sakban nyaot mudel ya?"
Kulop merati Amat.
Yang diperati nginggel-nginggel kepala e. "Dek apalah Lop, kita kan cuma ngucap salam bai."
"Cube ki tugek agik Mat..."
Barulah
Amat nek nyapai e, pek adep lawang umah lah keliat Mang Sakban. Urang tua ya dek bida sikit aben kek Bak Kulop, sama-sama
tukang mereteng.
"Sambelingkong, sambelingkong akek ki. Bilong ki kecurik ok. Lah ko padeh dek meli, agik maler sambelingkong-sambelingkong..."
Amat
nyuwet kaki Kulop. "Mang Sakban ne tuli urang e, panteslah nya dek nyambong."
Kulop ngakak sekali terinteng kek umong Amat.
"Matoootttt..."
Mang Sakban turon dari tanggek umah e, mereh budak due. Renyek nya nempap sungot Kulop yang tengah ngakak
ya. Cepet-cepet kulop berenti ngakak.
"Ikak ne dek mateh kek urang tua. Lah ko padeh ko dek renyek meli sambelingkong.
Ngapa ge ikak dek nenger ne?"
Kena lah terinteng di, Kulop merik reti pakai tangen kek Mang Sakban. "Kami ne ukang nyuwal
sambelingkong Mang, tapi tadik e ngucap slamalaikom."
Mang Sakban merati tangen Kulop ngangket kates. "Oooo, jadi ki nek
belajar ngebang kek ko. Cemne Jang cara e."
Urang tua ya lah nurot ge ngangket tangen siah mucak kaen sarong. Sungot e
lah siap nek ngebang.
"Allahu Akbar, Allaaaahu Akbaaaarrrr.....
Budak due ya temangal-mangal ningok pulah Mang Sakban.
Apa tu, urang tua ya nambeh meraning. Tapi untong Kulop cepet negeh e siah pakai base isarat.
"Mang kami minta maaf, Bak
ko minta tolong. Nya tengah gelugut pek umah nu."
|
